რა არის GPA და როგორ გამოვთვალოთ ის?

GPA არის აბრივიატურა, რომელიც იშიფრება - Grade Point Average და წარმოადგენს თქვენი ნიშნების საშუალო მაჩვენებელს. 

🔴 რისთვის არის საჭირო GPA?
GPA ესაჭიროებათ მათ, ვისაც საზღვარგარეთ სწავლა აქვთ გადაწყვეტილი, როგორც ბაკალავრიატზე, ასევე მაგისტრატურაზე. მათ, ვისაც ბაკალავრიატზე სწავლის გაგრძელება სურთ - ესაჭიროებათ სკოლის GPA, ანუ სკოლის ნიშნების საშუალო მაჩვენებელს, ხოლო მაგისტრატურაზე - ბაკალავრიატის GPA - ანუ ბაკალავრიატის ნიშნების საშუალო მაჩვენებელს. ​

🔴 როგორ გამოვთვალოთ GPA? 
საზოგადოებაში გავრცელებულია მცდარი წარმოდგენა, რომ GPA აუცილებლად 4 ქულიანი სისტემით უნდა იყოს გამოსახული. ეს მცდარი მოსაზრება  შექმნილია ამერიკული სისტემის გამო.

ამერიკული შეფასების სისტემა მოიცავს ხუთ ნიშანს - A,B,C,D,F. ვინაიდან ქულის მიმნიჭებელი არის 4 ნიშანი - A, B, C, D (F – Fail - ჩაჭრა, შეფასება ვერ მიიღო) და მათი რიცხობრივად გამოსახვა არ შეიძლება, შექმნეს 4 ქულიანი სისტემა, საიდანაც A შეესაბამება - 4 ქულას, B – 3 ქულას, C – 2 ქულას და D – 1 ქულას. (უფრო ზუსტი შეფარდებისთვის იხილეთ ბმული https://goo.gl/XivGPN ). 

რაც შეეხება საქართველოს, ჩვენი შეფასების სისტემა არის 1-დან 10 ქულამდე, ამიტომ იგი არ ერგება 4 ქულიან სქემას და არც არის საჭირო გადაყვანა. 

რეალურად, GPA გამოთვლა ძალიან მარტივია. შეკრიბეთ თქვენი ყველა ნიშანი და გაყავით ის საგნების რაოდენობაზე. ეს არის თქვენი GPA. 

უცხოური უნივერსიტეტების აპლიკაციის შევსებისას, თქვენ არ გთხოვენ GPA-ს მითითებას 4 ქულიანი სქემით, უბრალოდ უნდა მიუთითოთ, რამდენ ქულიანი სისტემიდან რამდენია თქვენი ნიშნების საშუალო მაჩვენებელი GPA.

 🔴 სად უნდა ავიღო GPA?
GPA-ს მონაცემები უნდა მოგცეთ იმ დაწესებულებამ, რომლის ნიშნებიც გესაჭიროებათ: სკოლის GPA - თქვენმა სკოლამ, უნივერსიტეტის GPA - თქვენმა უნივერსიტეტმა. იმ შემთხვევაში, თუ GPA ფურცელი არის ქართულ ენაზე, აუცილებლად დაგჭირდებათ მისი თარგმნა და ნოტარიულად დამოწმება.